首先你唔好話我番舊帳，你自己初入黎0個個幾月，你自問自己表現係咪好好先？
初初你話我冇俾時間你，ok，過左1個禮拜，2個禮拜，3個禮拜，你自問自己係咪懶先？
你地成日話每日都OT，我今日同阿shan傾起，計計下，星期1至4，你地OT d咩？
你地本應放8點架，d堂去到7點3，最多overrun埋7點半，
半個鐘，處理一個學生需要30mins？
就算去到7點9，15mins唔可以抹埋枱，浸埋d碟？
7點0個d時間得1，2個小朋友，咁你地有冇善用時間先？
我已經講過，除左筆要即日洗，其他野可以沖沖水浸住等萍姐洗，
畫都已經講過，冇話一定要即日攝晒喎，咁Attendance List同影相都唔夠時間？
講埋星期日，基本上Michael成日早黎，6點半乜都完啦，
咁點解你又要OT呢？你上個禮拜日做咩黎？入左去整輕黏土=.=
你要將d時間拎去玩，唔做野，到最尾又呻OT，我點幫你呀？
星期日本應要做既野，已經完全冇做，我都已經冇話你咩，俾你星期一做先做，咁你仲想點？
你地成日口口聲聲話公司點點點唔好，咁到頭黎你地有冇諗過你地自己係咩表現先？
你自問你地每分每秒都係好忙？你地用左幾多時間吹水偷懶，有冇計過？
（仲要蛇王都唔醒，俾人發現@@）
我知大家星期六係捱得好辛苦，但係請唔好因為星期六OT就口口聲聲話日日都要OT。
阿Shan都想知你地OT d咩？可能遲d佢都會問下你日常工作有咩困難之處，有咩可以減輕。

你話我叫你係走就快d走，等我一次過Hurt埋佢，我唔係要令你過意唔去，
人係自私架，一開始一定係為自己諗先架。你話係都等你搵到份好d既工先走，呢樣係你既自私，
我話你係走就快d走，相對地，呢樣係我既自私。
你自私地話搵到好既先走， Train一個新人係要時間架。
教完你野你話走，我時間多到冇頂洗嗎？你冇考慮過我既感受。
我自私咁話你係走快d走，好對唔住，係我冇諗過你會點諗，係我自私地講左出黎。
所以呢個問題，我覺得唔駛再講，因為已經解釋左。

假面具呢樣野，雖然我唔知你係咪話我，不過你同阿Mon背後點講我，我心照啦，
但係我自問問心無愧，我有冇為你地諗過，你地自己諗，
一直以黎呢到都改變緊，大家都唔想同事做得咁辛苦，有d野一直都改善緊，
呢樣野你問So老師都會知，呢到d野係點樣一直轉變緊，
當然，用唔同方法去處理事情，都會各自有好處壞處，
但係起碼我覺得現時既工作流程，係俾以前好左既。
0個日同你同So老師傾完之後，我都有再同阿shan傾啦，難道你覺得我地係不理同事既死活？
咁我同shan傾黎做咩？而家我好鍾意同人吹水咩？

0個日你問我有冇掛住阿Mon，難道我一直懷念Mon姐姐0係到既日子，佢就會番黎？
我都好掛住Summer Job既Jenny姐姐架，但係佢地2個都唔0係到，已經係事實。
如果我係唔滿意Mon姐姐，我就唔會為左佢走而喊，咁耐以黎，我冇為個任何一個LB同事走而喊，
Mon姐姐係第一個，你覺得佢走我會好開心嗎？
佢黎既時候，我本身有種感覺，覺得佢係可以做得長架，
如果唔係我都唔會耐唔屎問佢做成點，辛唔辛苦，
到你問我，有冇諗過佢走係我既問題，你咁問得我，即係我既問題啦，你覺得我唔難受咩？
由頭到尾，以阿Mon既工作表現，佢既人工係低，我亦都有同阿Shan講過，佢都滿意架，
我都有同阿Mon講過，價錢呢d野有得傾架，最終出黎既結果係佢未到3個月就走，咁我可以點？

你地話我好成日話你地，咁你地知唔知，有d野，係阿Shan問我，我先要出黎同你地講你地做錯左。
難道我可以下下都同佢講，你自己出去問佢地啦，唔關我事架。
次次都係我做醜人出黎同你地講錯咩錯咩，我好鍾意做衰人咩？
（雖然我鍾意扮醜臉，但係耐唔屎我都好想做番個「令女」架=.=）
有d錯可能係我地太過執著，ok，我地降低要求去遷就你地，
但係有d錯係一定要講架播，AL mark得錯又亂，呢d野冇得隻眼開隻眼閉架播，
錯晒點收學費？出少d糧俾你ok嗎？只要你地做好d，咪少d機會俾我地話囉。

前途方面你自己諗啦，咁你又認為你之前份工做左2年又好有前途可言？
（唔記得左你做左幾耐，但係我記得唔短囉。）
你成日話分店幾時開呀，你覺得開分店等於玩大富翁買塊地咁易？
我地既員工轉變一直都有問題，好多野都做得唔好，Sales方面亦都做得唔足，
憑咩去開分店？你唔覺得我地d學生係一直流失緊而新學生係少左？
你地要加人工，ok，阿Shan拎咩業績去同上面撐？
講真，某程度上我覺得你諗得太過簡單，入黎做左2個月你想升咩Post？
拜託，你試用期都未過，想點=.=
我諗大部份人要升職加薪，都唔會係初入公司2個月就講囉，
睇野睇長線d，我都捱左2年幾先有今日叫做滿意既結果，如果你要人工過萬既，
Promoter，Sales有commission呢d要追數既就大機會囉，不過人地係一分”奸雲”一分收穫架。

我之前一直都有反覆思量，我係唔適合做人上司，但係0係呢一個環境下，
我唔教人做野，邊個教？我都有諗過，減番我少少人工（少少好la，唔好太多 /_ ）
變番我唔係呢個Post，但係諗深一層，呢個名只係For派卡片出去個名靚d咋，同我之前做既冇變架，
但係相對地壓力係大左囉，你地有問題發生，關我事架。
而且我最憎就係人地用呢個名串我，我都覺得好難受架。（0個d咩人地Manager黎架呢d悔氣說話）

今日我又同阿Shan傾過計，得到一d初步結論，亦都迫佢快d計下人工，
最終諗左好多方法，包括請阿嬸做PM Part-time，專係洗野，執畫，
其實呢樣野阿Shan 0係Summer之前已經有提過，不過當時我係極力反對，
但係而家我亦已經考慮緊利害因素。
與其請d後生番黎會發生咁多事，可能請年紀大d既人會好d（呢個係我呢一刻既感受）
同事話OT，ok，平日再番遲d，放番遲d，冇OT嘞播，滿意未？
星期六Part-time一定會請，朝9晚9係好難頂，請多d人分shift，ok嘞掛。
最關心既問題，人工，初步黎講Full都會有7幾至8，Part都會有2幾至3 per Hour。
價錢呢d野，唔係我話事，亦都唔係阿Shan話事架，
但係我都已經盡左力去Fight番黎，唔滿意既我都冇辦法。

當我今晚睇完你個Blog，我發覺我做既好似係傻架，唔值得架。
你要走定留，你自己決定，如果我唔係有心為你，
我都唔需要花時間去講咁多野，亦都唔需要同阿Shan傾呢樣傾0個樣，
以前既我算係公司分明架，而家既我真係變左嘞，變到阿Shan都可能覺得我偏私嘞。
講多次，咁耐以黎我問心無愧，做得野既人我係唔會唔鍾意架，
以前Grace本身俾人炒走架，係之後佢做野有改善，係我堅決要留佢，阿Shan先唔炒佢架，
所以唔該唔好下下覺得我好似好絕情咁，我冇你地想像中咁複雜架。

最後，我地做咁多野，都想做野可以做得開開心心，大家相處融洽架，
我做野都好辛苦架，唔係下下你地呻我地都要遷就你地架。我覺得呢間公司已經算係咁嘞。